ಕರುಣವಿರಲಿ ಗೆಳತಿ ನಿನ್ನ ಸೋಕಿದ
ತಂಗಾಳಿಯ ಇತ್ತ ಕಳಿಸುವಾಗ

ಇಲ್ಲಿರುವಾಗ ಒಬ್ಬಂಟಿಯಾಗಿ ನಾನು
ಭರಿಸಲಾರೆನು ಅದರ ತಂಪು

ಕರುಣವಿರಲಿ ಗೆಳತಿ ನೀನು ಮುಡಿದ
ಹೂವ ಗಂಧ ಇತ್ತ ಕಳಿಸುವಾಗ

ಇಲ್ಲಿರಲು ಒಬ್ಬಂಟಿಯಲ್ಲವೇನೆ ನಾನು
ಭರಿಸಲಾರೆನು ಅದರ ಘಮವ

ಕರುಣವಿರಲಿ ಗೆಳತಿ ನಿನ್ನ ಬಳೆಗಳು
ಹೊರಡಿಸಿದ ಸದ್ದು ಇತ್ತ ಕಳಿಸುವಾಗ

ನನ್ನ ಕಿವಿಗಳಿ ಭರಿಸಲಾರವು
ನಿನ್ನ ಜೊತೆಯಿಲ್ಲದ ಬರಿಯ ಸದ್ದನು

ಕರುಣವಿರಲಿ ಒಬ್ಬಳೇ ನಡೆವಾಗ
ಅಲ್ಲಿ ಏಳುವ ಹೂಕಂಪನಗಳು

ನನ್ನೆದೆಯ ತಲುಪಿದರೆ
ಒಬ್ಬನೇ ಭರಿಸಲಾರೆನು ಗೆಳತಿ

ಕರುಣವಿರಲಿ ಗೆಳತಿ ಸರಿರಾತ್ರಿಯಲಿ
ನೀನು ಮಗ್ಗಲು ಬದಲಿಸುವಾಗ

ಒಬ್ಬನೇ ಹೇಗೆ ಭರಿಸಲಿ ಹೇಳು
ಅದು ಕೊಡುವ ರೋಮಾಂಚನವ

-ಕೆಂಚನೂರಿನವ