ಏನೂ ಚಿಗುರುವುದಿಲ್ಲ
ನಿನ್ನಲ್ಲಿ
ಎಂದು ಕವಿ ಜರಿದ
ಕಳ್ಳಿ ಗಿಡ
ಎರಡು ಹೂವರಳಿಸಿ
ಮರುಭೂಮಿಯನ್ನ ಸಂತೈಸಿತು

ಎರಡೇ ಕಣ್ಣು
ಲೆಕ್ಕವಿಲ್ಲದಷ್ಟು ನೋಟ

ದೃಷ್ಟಿ ಕೊಡಬಹುದು
ದೃಷ್ಟಿಕೋನವಲ್ಲ

ಕಣ್ಣು ಮುಚ್ಚಿದಾಗಲೆಲ್ಲ
ಕತ್ತಲಾಗುತ್ತದೆ
ಕಣ್ಣು ತೆರೆದಾಗಲೆಲ್ಲ
ಬೆಳಕಿರುವುದಿಲ್ಲ

ಕತ್ತಲಲ್ಲಿ
ಸಮಾನತೆ ಇದೆ
ಎಲ್ಲವೂ ಕಪ್ಪಾಗುತ್ತದೆ

ಎಲ್ಲ ಹೂಗಳೂ
ಸೂರ್ಯನ ಪಾಲಲ್ಲ
ಕೆಲವು
ಚಂದ್ರನ ಕಂಡೂ ಅರಳುತ್ತವೆ

ಬಹಳ ನಾಚಿಕೆ
ಹೂಗಳಿಗೆ
ಬೆಳಕಲ್ಲಿ ಅರಳುವುದಿಲ್ಲ

ಮೋಡವಾದರೆ ಸಾಕು
ನವಿಲ ಆಸೆಗೆ
ಕಣ್ಣು ಸಾವಿರ

ಬೆಳದಿಂಗಳು

ಸೂರ್ಯನಿಂದ
ಚಂದ್ರ ಕಡ ತಂದ
ಬೆಳಕು
**************************
ಎಲ್ಲೇ ಬಿಟ್ಟರೂ
ಮತ್ತೆ ಬಂದು
ಸೇರುವ
ನಮ್ಮನೆಯ ಬೆಕ್ಕಿನಂತದ್ದು
ನಿನ್ನ ನೆನಪು

ಬಹಳ ಪ್ರೀತಿಯೇನಿಲ್ಲ
ನೀನೆಂದರೆ ನನಗೆ
ಆದರೂ...
ನಿನ್ನ ಧೇನಿಸಿದ್ದು ಸುಳ್ಳಲ್ಲ
ತುಂಬು ಕಂಗಳ ಜೊತೆಗೆ
ನನ್ನ ಏಕಾಂತದಲ್ಲಿ
ಭರಿಸಲಾಗದ ಅವಮಾನದಲ್ಲೊಮ್ಮೆ
ಮತ್ತೆ ಕನಸುಗಳು ಕಮರಿ ಬಿದ್ದಾಗ
ನೀನು ಬಂದಿರಲಿಲ್ಲ ಅಷ್ಟೇ

ನನಗೂ ನಿನ್ನೆಡೆಗೆ ನಡೆದು ಬರುವ ಧೈರ್ಯವಿರಲಿಲ್ಲ
ನೀನೂ ಕೈ ಹಿಡಿಯಲಿಲ್ಲ

ಇಂದೂ ನಿನ್ನದೇ ಧ್ಯಾನ ನನಗೆ
ಈ ಸಂಭ್ರಮವೆಲ್ಲ ನಿನ್ನದೇ ಕಾಣಿಕೆ
ನಮ್ಮದೇನಿದ್ದರೂ ವ್ಯರ್ಥ ಹವಣಿಕೆ
ಜನ್ಮ ಕೊಟ್ಟವರಿಗಷ್ಟೆಯಲ್ಲ
ನಿನಗೂ ನಾ ಚಿರಋಣಿ
ಬೆನ್ನ ಹಿಂದೆಯೇ ಇದ್ದರೂ
ಇರಿಯದೇ ಇದ್ದುದಕ್ಕೆ

ಆದರೆ ಈಗೀಗ ಅನ್ನಿಸುತ್ತಿದೆ
ನಿನ್ನ ದ್ವೇಷಿಸಬೇಕೆಂದು
ಬದುಕ ಪ್ರೀತಿಸಬೇಕೆಂದು
ಆದರೇನು?
ದ್ವೇಷಿಸಿದರೂ ಪ್ರೀತಿಸಿದರೂ
ನೀ ಬರುವುದುದು
ನಿನಗೆ ಬೇಕೆನ್ನಿಸಿದಾಗಲೇ
ನಾನು ಕೋರಿದಾಗಲಲ್ಲ
ಆದರೂ ಒಂದು ಕೋರಿಕೆ
ಬರಬೇಡ ಹಿಂಬಾಗಿಲಲ್ಲಿ ಕಳ್ಳನಂತೆ
ಎದುರಲ್ಲೇ ಬಾ
ಆಪ್ತ ಮಿತ್ರನಂತೆ
ತೋಳ್ದೆರೆದು ಸ್ವಾಗತಿಸುವೆ

ಸಾವಿಗೆ

ಬಹಳ ಪ್ರೀತಿಯೇನಿಲ್ಲ
ನೀನೆಂದರೆ ನನಗೆ
ಆದರೂ...
ನಿನ್ನ ಧೇನಿಸಿದ್ದು ಸುಳ್ಳಲ್ಲ
ತುಂಬು ಕಂಗಳ ಜೊತೆಗೆ
ನನ್ನ ಏಕಾಂತದಲ್ಲಿ
ಭರಿಸಲಾಗದ ಅವಮಾನದಲ್ಲೊಮ್ಮೆ
ಮತ್ತೆ ಕನಸುಗಳು ಕಮರಿ ಬಿದ್ದಾಗ
ನೀನು ಬಂದಿರಲಿಲ್ಲ ಅಷ್ಟೇ

ನನಗೂ ನಿನ್ನೆಡೆಗೆ ನಡೆದು ಬರುವ ಧೈರ್ಯವಿರಲಿಲ್ಲ
ನೀನೂ ಕೈ ಹಿಡಿಯಲಿಲ್ಲ

ಆದರೆ ಈಗೀಗ ಅನ್ನಿಸುತ್ತಿದೆ
ನಿನ್ನ ದ್ವೇಷಿಸಬೇಕೆಂದು
ಬದುಕ ಪ್ರೀತಿಸಬೇಕೆಂದು
ಆದರೇನು?
ದ್ವೇಷಿಸಿದರೂ ಪ್ರೀತಿಸಿದರೂ
ನೀ ಬರುವುದುದು
ನಿನಗೆ ಬೇಕೆನ್ನಿಸಿದಾಗಲೇ
ನೀನು ಬಯಸಿದಾಗಲಷ್ಟೆ
ನಾನು ಕೋರಿದಾಗಲಲ್ಲ
ಆದರೂ ಒಂದು ಕೋರಿಕೆ
ಬರಬೇಡ ಹಿಂಬಾಗಿಲಲ್ಲಿ ಕಳ್ಳನಂತೆ
ಎದುರಲ್ಲೇ ಬಾ
ಆಪ್ತ ಮಿತ್ರನಂತೆ
ತೋಳ್ತೆರೆದು ಸ್ವಾಗತಿಸುವೆ

-ಕೆಂಚನೂರಿನವ

ಕೇದಗೆಯ ಬನದಲ್ಲ
ಮೈ ಮರೆತು ಮಲಗಿತ್ತು
ಘಮದ ಅಮಲಿನಲಿ
ಕೇಕೆ ಹಾಕಿತು
ರಣಹದ್ದು ಒಮ್ಮೆ
ಅಮಲಿನಲಿ ಕೇಳಲಿಲ್ಲ
ಹಾವಿಗೆ
ಇನ್ನಷ್ಟು ಹತ್ತಿರದಲಿ
ಸಾವಿನ ಕೇಕೆ
ಭ್ರಮೆ ಬಿಟ್ಟು ಎದ್ದರೆ
ಬಿಡುತ್ತಿಲ್ಲ
ಕೇದಗೆಯ ನಂಟು
ಓಡಲು
ಎರಗಿದ ರಣಹದ್ದು
ಬಾಚಿಕೊಂಡಿತು ಕಾಲಲ್ಲಿ
ಮೇಲೆರುತ್ತದ್ದಂತೆಲ್ಲಾ
ಅಮಲು ಮರೆಯಾಗಿ
ನಿಜದ ದರ್ಶನ
ತಡವಾಗಿ ಬಿಟ್ಟಿದೆ
ಇನ್ನಿಲ್ಲ ಪ್ರಯೋಜನ
ಸಾವು ಕರೆದೊಯ್ಯುವಾಗ
ಹಿಂಬಾಲಿಸ ಬೇಕಷ್ಟೆ
ಇದು ಬದುಕು

ಅಮಲಿಳಿಯದೆ ದರ್ಶನವಿಲ್ಲ
ದರ್ಶನವಿಲ್ಲದೆ ಅಮಲಿಳಿಯುವುದಿಲ್ಲ

ಗೆಳತಿ
ಮನೆ ಮುಂದೆ ನೆಟ್ಟ
ಮಲ್ಲಿಗೆಯ ಹಂಬಲ್ಲಿ
ನಸುಕಿನಲಿ ಬಿರಿದ
ಹೂಗಳಿಗೆ
ನಿನ್ನ ನಗೆಯದೇ ಚೆಲುವು

ಗೆಳೆಯನಿಗೆ

ದಾಟಲೇಬೇಕೆಂಬ ಧಾವಂತವೇಕೆ?
ದಾಟಲಾಗದ ಕಡಲು ಮೂರುದಿನದ ಬಾಳು

ಮೀಟಿ ನೋಡು ಪ್ರತಿ ಎದೆಯ ತಂತಿ
ಮಧುರ ಸಂಗೀತದಂತೆ  ಕೇಳಬಲ್ಲೆಯಾದರೆ
ಅಣಿಗೊಳಿಸು ನಿನ್ನೆದೆಯ ವೀಣೆಯಂತೆ
ಯಾರೋ ಬಂದು ಮೀಟಲು ಕೇಳೀತು
ಮಧುರ ಸಂಗೀತದಂತೆ

ನೋವ ಹುಡುಕಿ ಹೊರಟ ನೀನು
ನಲಿವ ಹೇಗೆ ಪಡೆಯುವೆ
ಪ್ರೇಮವಿರಲಿ ಎದೆಯಲಿ
ನಾವು ನೋಡಿದಂತೆ ಜಗವು
ಕಾಣುವುದು ನಂಬು ಗೆಳೆಯ

ಹೆಚ್ಚು ಲೆಕ್ಕಾಚಾರ ಬೇಡ
ಮೂರು ದಿನದ ಬಾಳಿಗೆ
ನೆಂಟರಂತೆ ನೋವು-ನಲಿವು
ನಮ್ಮ ಇಂದು-ನಾಳೆಗೆ
ನಂಬಿ ಬದುಕು ತಣ್ಣಗೆ

ಇವಳ ಸಹವಾಸದಿಂದ
ಕೆಟ್ಟ ಸನ್ಯಾಸಿ ನಾನು
ಖೇದವೇನಿಲ್ಲ ಕೆಟ್ಟಿದ್ದಕ್ಕೆ
ಕೇದಗೆಯ ಬನ ಹೊಕ್ಕು
ಸೌಗಂಧ ಪಡೆಯದೆ ಬರಲಾಗದು

ಹೂ ಕವಿತೆ

ಸುಮವನದ ದಾರಿಯಲ್ಲಿ
ಹಾಯ್ದು ಹೋಗಿದ್ದಕ್ಕೆ
ಗಾಳಿಗೆ ಸುಮವು ನೀಡಿದ್ದು
ಪರಿಮಳದ ಕಾಣಿಕೆ
ದಾರಿಯುದ್ದಕ್ಕೂ ಹರಡಲೆಂದು
ಗಾಳಿಯೂ ಉದಾರಿ...
ಉಳಿಸಿಕೊಳ್ಳಲಿಲ್ಲ ಏನನ್ನೂ
ಹಂಚಿ ಹೋಯಿತು ದಾರಿಯುದ್ದಕ್ಕೂ

ಕಲಿಯಬೇಕು ನಾನೂ
ಸೋಕಿ ಹೋದವರಿಗೂ
ಹೊಸಕಿ ಹೋದವರಿಗೂ
ಸಮನಾಗಿ ಪರಿಮಳ ಹಂಚುವ
ಹೂವಿನ ಉದಾರತೆ

ಕಲಿಯಬೇಕಿದೆ ಗಾಳಿಯಿಂದಲೂ
ಪಡೆದದ್ದನ್ನ ಉಳಿಸಿಕೊಳ್ಳದೆ
ಅಲ್ಲಲ್ಲೇ ಹಂಚುವ ಸುಗುಣವನ್ನ

ಎದೆಯ ಬಯಲಲ್ಲಿ
ಅಲೆಮಾರಿಗೊಂದು  ನೆಲೆಯ ಕೊಟ್ಟೆ
ಡೇರೆ ಕಟ್ಟಿದ ಅಲೆಮಾರಿ
ಮತ್ತೆ ಯಾರು ಕರೆದರೋ ತಿಳಿಯದು
ಹೊರಟು ಹೋಗಿದ್ದಾನೆ
ಬಯಲಲ್ಲಿ ಡೇರೆ ಕಿತ್ತು
ಡೇರೆಯ ನೆನಪನ್ನುಳಿಸಿ

ಅಂದುಕೊಳ್ಳುತ್ತೇನೆ ಅಲೆಮಾರಿಗಳಿಗೆ
ಹೃದಯ ಕೊಡಬಾರದೆಂದು

ಆದರೆ ಬಾಗಿಲಲ್ಲಿ ಬಂದು ನಿಲ್ಲುವ
ಫಕೀರನ ಕಣ್ಣಲ್ಲಿ ಅದೇನೋ ಹೊಳಪು
ಸಜ್ಜುಗೊಳಿಸುತ್ತೇನೆ ಎದೆಯನ್ನು
ಮತ್ತೆ ನೋವು ತಿನ್ನಲೆಂದೇ

ಆ ಅರಳಿ ಕಟ್ಟೆಮೇಲೆ
ಒಂದಷ್ಟು ಜನ
ಹಿರಿಯರು,
ಇನ್ನೊಂದು ಕಡೆ
ಗಾಜು ಒಡೆದಿದ್ದಕ್ಕೆ
ಚಿತ್ರ ಮಾಸಿದ್ದಕ್ಕೆ
ಪೂಜೆಯ ಅರ್ಹತೆ
ಕಳೆದುಕೊಂಡ
ದೇವರ ಫೋಟೋಗಳು

ವನ ಸುಮದ ಸೌರಭಕೆ
ಪುಳಕಗೊಂಡು ಕೋಕಿಲ
ನಾಡಿಗೆಲ್ಲ ಸಾರುತಿಹುದು
ಬಂದನೆಂದು ವಸಂತ

ನನ್ನೆದೆಯಲೊಂದು ಹೂವು ಅರಳಿ
ನಿನ್ನ ಕರೆಯುತಿರುವುದು
ಕೇಳಲಿಲ್ಲವೆ ನಿನಗೆ
ಪ್ರೇಮ ಸುಮದ ಇನಿದನಿ

ದೂರ ನಿಂತು ಹೀಗೆ-
ನೀನು ಕೆಣಕಬೇಡ ಸುಮ್ಮನೆ
ಅರಳಿ ನಿಂತ ಪ್ರೇಮ ಸುಮವು
ಬಯಸುತಿಹುದು ನಿನ್ನನೇ

ದುಂಬಿಯಾಗಿ ನೀನು
ಬಂದು ಸೇರು ನನ್ನನು
ಮರಳಿ ಹೋಗೋ ಮಾತು ಬೇಡ
ದಿನವೂ ಜೇನ ಕೊಡುವೆನು

ಪಲುಕುಗಳು
*******************
ನಾನು ಇತ್ತೀಚೆಗೆ ಕುಡಿಯುವುದನ್ನ ಬಿಟ್ಟಿದ್ದೇನೆ
ಕಾರಣವಿಷ್ಟೇ
ಅವಳ ನೆನಪಿನಲ್ಲಿ ಸಾಕಷ್ಟು ಅಮಲಿದೆ
***********************************
ಸದಾ ಅವಳ ನಶೆಯಲ್ಲೇ ತೇಲುವ ನನ್ನ ಕಂಡು
ನನ್ನ ಮಧುಶಾಲೆಯ ಮಿತ್ರರಿಗೆ ಹೊಟ್ಟೆ ಕಿಚ್ಚು
***********************************
ಮಧು ಶಾಲೆಯ ಮಾಲಕಿಗೆ ನನ್ನ ಮೇಲೆ ಅನುಮಾನವಂತೆ
ಇವನು ಇನ್ನೆಲ್ಲೋ ಕುಡಿದು ಬರುತ್ತಿರ ಬಹುದೆಂದು
***********************************
ಮಧು ಕರುಳು ಸುಡುತ್ತದಂತೆ
ನಿಮಗೆ ಗೊತ್ತಿಲ್ಲ
ಪ್ರೀತಿ  ಪ್ರೇಮ ಹೃದಯವನ್ನ ಸುಡುತ್ತೆ
***********************************
ಕಳ್ಳನಷ್ಟೇ ಅಲ್ಲ
ವಿರಹಿಯೂ ಬೆಳದಿಂಗಳನ್ನ ಬಹಳ ದ್ವೇಷಿಸುತ್ತಾನೆ
***********************************
ಕಣ್ಣು ಹನಿಯಾಗದೆ
ಯಾವ ಪ್ರೇಮವೂ ಕೊನೆಯಾಗಿಲ್ಲ
***********************************

ಬಾನ ಚಂದಿರ ಹೂವ ಹಂದರ
ಇದಕೂ ಸುಂದರ
ನನ್ನ ಚೆಲುವೆಯ ಅಂದವು
ಕನಸಿನೂರಿನ ದಾರಿಯುದ್ದಕೂ
ಹೂವು ಚೆಲ್ಲಿದ ನಗೆಯ ಬೆಡಗು
ಮೀರಿ ಹೋಗಲು ಸಾಧ್ಯವಾಗದ
ಕಣ್ಣ ಅಂಚಿನ ಕರೆಗಳು

ಬಿಡದೆ ಹರಿವ ಒಲವ ತೊರೆಗೆ
ಒಡ್ಡಲಾಗದು ತಡೆಯನು
ತೆರೆದು ನಿಂತೆನು
ಎದೆಯ ಬಯಲನು
ಹಲವು ಹೂವು ಅರಳಿ ನಿಂತಿತು
ಒಲವ ಹೂವ ಬೇಡಿ ಪಡೆದಳು

ಹೂವೆ ಹೂವ ಮುಡಿದ
ಪರಿಯ ಕಂಡು
ಬೆರಗುಗೊಂಡು ನಿಂದೆನು

ಬಹಳ ಹೋಲಿಕೆಯಿದೆ
ನನ್ನ ನಸೀಬಿಗೂ
ಬೇಸಿಗೆಯ ಕರೆಂಟಿಗೂ
ಎರಡೂ
ಕೈ ಕೊಡುತ್ತವೆ
ಸಮಯ ನೋಡಿ

ನಿರೀಕ್ಷೆಗಳ ಭಾರ
ತಾಳದೆ ಕುಸಿದ
ಪ್ರೇಮಸೌಧದ
ಅವಶೇಷಗಳಡಿಯಲ್ಲಿ
ವಿಲೇವಾರಿ ಮಾಡಲಾಗದಷ್ಟು
ನೆನಪುಗಳು
ಹೆಣವಾಗಿ ಬಿದ್ದಿವೆ

ತುಳಸಿ ಹಬ್ಬದ
ದಿನದಂದು
ನಿನ್ನ ಜರಿಲಂಗದಲ್ಲಿ
ಪ್ರತಿಫಲಿಸುತ್ತಿದ್ದ
ಬೆಳಕನ್ನ ನೆನೆದರೆ...
ಗೆಳತಿ
ನಿಜ ಹೇಳುತ್ತೇನೆ
ಈಗಲೂ ಹೊಳೆಯುತ್ತವೆ
ನನ್ನ ಕಂಗಳು

ಗೆಳತಿ...
ನಿನ್ನ ಕಣ್ಣ ಹೊಳಪು
ನನ್ನ ಬಾಳ ಬೆಳಕು

ಹೀಗೆಲ್ಲಾ ಬರೆಯಬೇಕು
ಅಂದುಕೊಂಡಿದ್ದೆ
ಅಷ್ಟರಲ್ಲೇ...
ಹಾಳಾದ ಕರೆಂಟು
ಕೈ ಕೊಡ್ತು

ನಲ್ಲಿ ಕಟ್ಟೆಯಲ್ಲಿ
ಖಾಲಿ ಕುಳಿತ
ಬಿಂದಿಗೆಗಳು,
ಕಾಯಬೇಕು
ತುಂಬಿಕೊಳ್ಳಲು
ನೀರು ಬರುವವರೆಗೂ

ನನ್ನದೇ
ಚೆನ್ನಾಗಿದೆ ಅದೃಷ್ಟ
ನಿನ್ನ ನೆನೆದರೆ
ಸಾಕು
ಕಣ್ತುಂಬಿಕೊಳ್ಳುತ್ತದೆ

ಬೇಯುತ್ತಿದ್ದೆ
ವಿರಹದುರಿಯಲ್ಲಿ
ಈಗಷ್ಟೇ
ಬಂದುಹೋದಳು
ಕೆಲವು ಕ್ಷಣಗಳ
ಮಟ್ಟಿಗೆ
ತೋಯಿಸಿದಳು
ಒಲವ ಮಳೆಯಲ್ಲಿ

ಮೌನದ ಬಗ್ಗೆ
ನಮ್ಮ ಗುರುಗಳು
ನಿನ್ನೆ
ಎರಡು ತಾಸು
ಮಾತಾಡಿದರು

ಅವಳಿಂದ ಕದ್ದ
ಎಲ್ಲಾ ಮುತ್ತುಗಳನ್ನು
ಅವಳಿಗೆ ಮರಳಿಕೊಟ್ಟು
ನಾಳೆಯಿಂದ
ನಿಯತ್ತಿನಿಂದಿರಲು
ನಿರ್ಧರಿಸಿದ್ದೇನೆ
ಮರೆಯದೆ
ಶುಭಹಾರೈಸಿ
ಗೆಳೆಯರೆಲ್ಲರು

ಕಣ್ಣು ತೆರೆದೇ
ಕನಸು ಕಾಣುವುದನ್ನ
ಹೇಳಿಕೊಟ್ಟವಳೀಗ
ಕಣ್ಣು ಮುಚ್ಚುತ್ತಿದ್ದೇನೆ
ಎಂದರೂ ಬರದಷ್ಟು
ದೂರ ಹೋಗಿದ್ದಾಳೆ
ನೀವೇನಾದರು ಕಂಡರೆ
ಅವಳಿಗೆ ಇಷ್ಟನ್ನು
ಮರೆಯದೇ ಹೇಳಿ
ಸಾಯುವಾಗಲೂ ಕಣ್ಣು
ತೆರೆದೇ ಇತ್ತೆಂದು