ನೆನಪಿರಲಿ...
ಊರಿನ ರಸ್ತೆ
ಅಗಲಿಸುವಾಗ
ಪಡೆದ
ಜಾಗಕ್ಕೆ ಮಾತ್ರ
ಪರಿಹಾರ.
ಹಾಕುವ
ದೊಡ್ಡದೀಪಗಳು
ಕಟ್ಟುವ ಡಿವೈಡರುಗಳು
ನಿಮ್ಮ ಇರುಳ
ಮತ್ತು ಬೆಳದಿಂಗಳು ಕಸಿದುಕೊಂಡಿದ್ದಕ್ಕೆ
ಚಲನೆ ಕಟ್ಟಿಹಾಕಿದ್ದಕ್ಕೆ ಪರಿಹಾರವಿಲ್ಲ
ಮೊನ್ನೆಯವರೆಗೂ
ಕೂಗಳತೆಯಲ್ಲೇ ಇದ್ದ ಎದುರು ಮನೆಯೀಗ
ಹೆಚ್ಚುದೂರವಿಲ್ಲ
ಬೇಲಿಸುತ್ತಿ
ಹೋಗಬೇಕಷ್ಟೆ
ಎರಡು ಮೈಲಿ
ಚಿಂತಿಸದಿರಿ ದೂರವಾಯ್ತೆಂದು
ಮನೆಮನೆಗೂ
ನೀಡಲಾಗುತ್ತಿದೆ ಇಂಟರ್ನೆಟ್ಟು
ಸುಧಾರಿತ ಭಾರತದಲ್ಲಿ
ಡೌನ್ ಲೋಡ್ ಮಾಡಿಕೊಳ್ಳಿ
ಬೇಕೆನಿಸಿದ ಸಂಬಂಧಗಳನ್ನು,
ಮತ್ತೆ ಯೋಚಿಸದಿರಿ
ಕಿಟಕಿಯಿಂದ ತೂರುತ್ತಿದ್ದ
ಹಾಲ್ಬೆಳದಿಂಗಳು ಇಲ್ಲವೆಂದು
ತೂರಿ ಬರಲಿವೆ
ಲೋ ಬೀಮ್ ಹೈ ಬೀಮ್
ಬೆಳಕಿನ ಚಿತ್ತಾರಗಳು
ನಿಮ್ಮ ಮನೆಯೊಳಗೇ
ಒಂದಷ್ಟು ನಿಮ್ಮ ತಲೆ ತಿನ್ನಲು
ಕಿಟಕಿ ತೆರೆದರೆ
ಬೆಳಕು
ಕಣ್ಣು ಮುಚ್ಚಿದರೆ
ರಾತ್ರಿಯಾಗುವುದಿಲ್ಲ
ಕತ್ತಲಾಗುತ್ತೆ
ಕಿಟಕಿ ತೆರೆದಾಗ
ಬರುವದೆಲ್ಲವೂ
ಬೆಳಕಲ್ಲ
ಧೂಳೂ ಸಹ
ಯಾವ ತೀರವನ್ನೂ
ನಂಬಬೇಡಿ
ತೀರಕ್ಕೆ
ಅರ್ಥವಿಲ್ಲ
ನೆರೆ ಬಂದಾಗ
ರೆಕ್ಕೆಯೊಂದೆ
ಸಾಲದು ಹಾರಲು...
ದೀಪ
ಆರುತ್ತದೆ
ಬೆಳಕಲ್ಲ
ದೀಪ ಹಚ್ಚಿಕೊಳ್ಳಬೇಕಷ್ಟೆ
ಯಾವ ನವಿಲು
ಗರಿಯೂ ಚಂದವಲ್ಲ
ನೋಡುವ ಕಣ್ಣಿನಲ್ಲಿ
ಸೌಂದರ್ಯವಿಲ್ಲದಿದ್ದರೆ
ಬೆಳಕಾಗುವುದು
ಕಷ್ಟ
ಇಷ್ಟಿಷ್ಟೇ
ಸುಟ್ಟುಕೊಳ್ಳಬೇಕು
ಬೆಂಕಿಯಾಗುವುದು
ಸುಲಭ
ರಾತ್ರಿಯ
ನೀರವ ಮೌನದಲ್ಲಿ...
ಇಳಿಸಂಜೆಯಲಿ ಕೇಳಿದ
ನಿನ್ನ ಕೈಬಳೆಗಳ
ಸದ್ದು
ಮತ್ತೆ ಕೇಳಿದಂತಾಗಿ
ಎದ್ದು ಕೂರುತ್ತೇನೆ
ಇಡೀ ರಾತ್ರೀ
ಮತ್ತೊಮ್ಮೆ
ಕೇಳುವ ಆಸೆಯಿಂದ
ಅವಳೆಂದಳು
ನಾನು ನಿನ್ನ
ಅಂತರಂಗದ
ಗೆಳತಿ.
ಅಂದಿನಿಂದ ಅವಳೊಂದಿಗೆ
ಮಾತು ಕಷ್ಟವಾಗುತ್ತಿದೆ
ತಿಳಿದಿರ ಬಹುದೇ
ಅವಳಿಗೆ
ನನ್ನ ಸಂಚು?
ಅಮ್ಮನಂತೆ ಅವಳು
ಅಳುವಾಗ ನಾನು
ಸಾಂತ್ವನದ ಕಡಲಾಗುತ್ತಾಳೆ
ಅಕ್ಕನಂತೆಯೇ ಅವಳು
ನಾನು ಗುಡುಗುವಾಗಲೆಲ್ಲ
ಇವಳು ಕರಗುವ ಮುಗಿಲು
ತಂಗಿಯಂತೆಯೂ ಇವಳು
ಪ್ರೀತಿಸ ಬಲ್ಲಳು ಜಗಳವಾಡುತ್ತಲೇ
ಜಗಳವಾಡ ಬಲ್ಲಳು ಪ್ರೀತಿಸುತ್ತಲೇ
ನನ್ನ ನೋವು ನಲಿವಿಗೆ
ಸದಾ ಜೊತೆಯಾಗುವ ಹೆಗಲು
ಗೆಳತಿ ಎನ್ನೋಣವೆಂದರೆ
ಇವಳು ಅದಕೂ ಮಿಗಿಲು
ನಿನ್ನ ನೆನಪಿನ ಪರಿಮಳವಿದೆ ಗೆಳತಿ
ಈ ತೋಟದ ಹೂಗಳಿಗೆ
ಆಘ್ರಾಣಿಸಿದಾಗಲೆಲ್ಲ ಕಣ್ತುಂಬಿ ಬಂದು
ಮರದ ಬೇರುಗಳಿಗೆ ಮುತ್ತಿಡುತ್ತೇನೆ
ನಿನ್ನ ಕೋಮಲ ಪಾದಗಳ ನೆನಪಿನಲ್ಲಿ
ಭಾವಾನುವಾದದ ಒಂದು ವಿಫಲ ಯತ್ನದಲ್ಲಿ
ನಿಮ್ಮ ಶಂಕರ
GOOD DAy
Remembering your scent,
wherever I saw a flower
I smelled it and tears began to pour
wherever I saw a cypress in the meadow,
I kissed its feet in memory of you.
Rumi
