ನಟ್ಟಿರುಳ ಬೆಕ್ಕುಗಳ ಹೇಷಾರವಕ್ಕೆ
ಕಡುವಿರಹಿಯ ನಿಟ್ಟುಸಿರಿನ ಪ್ರತಿಕ್ರಿಯೆ

-ಕೆಂಚನೂರಿನವ

ತಡರಾತ್ರಿವರೆಗೂ
ಧೋ ಎಂದು ಸುರಿದ ಮಳೆ
-ಯ,ಕೆಲವೇ ಹನಿಗಳು ಉಳಿದಿವೆ
ಗರಿಹುಲ್ಲಿನ ಮನೆ ಮಾಡಿನ ಮೇಲೆ
ಮುಂಜಾವಿನ ರಶ್ಮಿಯಲ್ಲಿ
ವಜ್ರದಂತೆ ಹೊಳೆಯಲು
-ಕೆಂಚನೂರಿನವ

ಸದ್ದಿಲ್ಲದೆ ಕಾಯತ್ತಿದೆ ಕಾರಿರುಳು
ಗೆಜ್ಜೆಕಾಲಿನ ಪುಟ್ಟಮಗು
ಹೊರಳಿ ಮಲಗುವಾಗಿನ ಗೆಜ್ಜೆ ಸದ್ದಿಗೆ
ಕಿವಿಯಾಗಲೆಂದು

-ಕೆಂಚನೂರಿನವ

ಗೂಡಿಂದ ಜಾರಿಬಿದ್ದ
ಮರಿಯಾಗಬೇಕಿದ್ದ ಹಕ್ಕಿಯ
ಮೊಟ್ಟೆ

ಒಂದು ಅಪೂರ್ಣ ಕವಿತೆ

-ಕೆಂಚನೂರಿನವ

ಶರದೃತುವಿನಲ್ಲೊಂದು ಎಲೆ
ಸದ್ದಿಲ್ಲದೆ ಕಳಚಿಬಿತ್ತು ಮರದಿಂದ,
ನನ್ನ ಪ್ರೇಮಕತೆ
-ಯಲ್ಲ ಇದು

-ಕೆಂಚನೂರಿನವ

ನಡುಹಗಲ ಕಣ್ಣು ಕುಕ್ಕುವ ಬೆಳಕಿದೆ
ಈ ಹೊಳಪುಗಣ್ಣಿನ ಹುಡುಗಿಗೆ
ನಾ ಹೇಗೆ ಕಣ್ಣು ಕೂಡಿಸಲಿ
ಇವಳ ನೋಟಕೆ

-ಕೆಂಚನೂರಿನವ

ಎರಡು ಬಟ್ಟಲು ಮದ್ಯ
ನಡುವೆ ಇರಬೇಕು ಅಂತರ
ಅದುವೇ 'ಮದ್ಯಂತರ'
-ಕೆಂಚನೂರಿನವ

ಪಗಡೆಯಾಡುವೆಯಾದರೆ ಹೇಳು
ಪಣಕ್ಕಿಡುವೆ ಹೃದಯವನು
ಪಂದ್ಯ ಸೋಲಲೆಂದೇ!!

-ಕೆಂಚನೂರಿನವ

ಬದಲಾಗದ ಬದುಕಿನ ಬಣ್ಣವಿಲ್ಲದ
ಕೆಲವು ಪುಟಗಳು -೨
"ನೋಡು,ನಾನಿರುವಂತ
ೆಯೇ ಹೇಗಿದ್ದೇನೋ ಹಾಗೆ
ಒಪ್ಕೊಳ್ಳೋಕೆ ಆದ್ರೆ
ಒಪ್ಕೊ ಇಲ್ಲಾಂದ್ರೆ
ಬಿಟ್ಟು ಬಿಡು ಈಗೇನೋ ಹೊಸದು ನಾ
ಬದಲಾಗ್ತೀನಿ ಹಾಗಾಗ್ತೀನಿ
ಹೀಗಾಗ್ತೀನಿ ಅನ್ನೋದು ಸುಲ್ಬ
ಆದ್ರೆ ಸತ್ಯ ಏನ್ ಗೊತ್ತಾ?
ನಾನು ನೀನಾಗೋಕಾಗಲ್ಲಿ
ನೀನು ನಾನಾಗೋಕು ಆಗಲ್ಲ
ಯಾಕಂದ್ರೆ ನಾನೇ ಬೇರೆ
ನೀನೇ ಬೇರೆ ಅರ್ಥ ಮಾಡ್ಕೋ
ನಾವಿಬ್ರೂ
ಮದುವೆ ಆದ್ವಿ ಅನ್ತಾನೇ ಇಟ್ಕೋ ಆಗ
ನಾನು ಇದೇ ತರ ತುಟಿಗೆ ಅರ್ಧ ಕೇಜಿ
ಲಿಪ್ಸ್ಟಿಕ್ ಹಚ್ಕೊಂಡು ಇದೇ ಹೋಟಲಿನ
ರಿಷೆಪ್ಶನ್ ನಲ್ಲಿ ನಿಂತ್ಕೊಂಡು ಹಲ್
ಕಿರೀತ ನಿಂತಿದ್ರೆ ತಡ್ಕೊಳ್ಳೋಕೆ
ಆಗುತ್ತಾ ನಿನ್ನ್ಹತ್ರ?.
ಹೋಗ್ಲಿ ಕೆಲಸ ಬಿಟ್ಟು ಮನೆಲಿರೋಣ
ಅಂದ್ರೆ ನಿನ್ನ ದುಡಿಮೆಲಿ ಇಬ್ರು ಬದ್ಕೋಕೆ
ಆಗುತ್ತಾ? ಅದೂ ಇಲ್ಲ ಹಿಗಿರೋವಾಗ
ಸುಮ್ನೆ ಹುಚ್ಚುಚ್ಚಾಗಿ ಪ್ರೀತಿ ಪ್ರೇಮ
ಅಂದ್ಕೊಂಡು ತಿರ್ಗಾಡೊದ್ರಲ್ಲಿ
ಯಾವ ಅರ್ಥ ಇದೆ ಹೇಳು ?, ಸುಮ್ನೆ
ನಾನು ಹೇಳೋದು ಕೇಳು.
ಬದುಕು ಇನ್ನೂ ತುಂಬಾ ಇದೆ ನಿನ್ನ
ಕಲ್ಪನೆಯ ಹೆಂಡ್ತಿ ನಾನಾಗೋಕೆ
ಸಾಧ್ಯಾನೆ ಇಲ್ಲ.ನಾನು ಬದುಕನ್ನ
ನೋಡೋ ರೀತಿನೇ ಬೇರೆ
ನೀ ನೋಡೊ ರೀತಿನೇ ಬೇರೆ.ಇಷ್ಟಕ್ಕ
ನನ್ನ ಬಗ್ಗೆ ಇರೋದು ಪ್ರೀತಿಯಲ್ಲ
ಒಂದು ರೀತಿ ಆಕರ್ಷಣಯಷ್ಟೇ ನಿನ್ನಲ್ಲಿ
ಇಲ್ದೇ ಇರೋ ಧೈರ್ಯ ನನ್ನ ಹತ್ರ ಇದೆ
ಅದಕ್ಕೇ ನಿಂಗೆ ಒಂಥರಾ ಆಕರ್ಷಣೆ ನನ್ನ
ಕಂಡ್ರೆ ಇದನ್ನೇ ಪ್ರೀತಿ
ಅಂದ್ಕೊಂಡು ಸುಮ್ನೆ ಜೀವಮಾನ
ಪೂರ್ತಿ ಒದ್ದಾಡ್ಬೇಡ ಊರಲ್ಲಿ ಒಳ್ಳೆ
ಹುಡುಗಿ sಸಿಗ್ತಾಳೆ ಮದುವೆಯಾಗಿ
ಚೆನ್ನಾಗಿರು ನಿನ್ನ
ಸಮಸ್ಯೆಯೇನು ಗೊತ್ತಾ?
ನೀನು ಅಗತ್ಯಕ್ಕಿಂತ
ಹೆಚ್ಚು ಒಳ್ಳೆಯವನು ನಿನ್ನನ್ತವರಿಗೆ
ನನ್ನಂಥವರು ಸೆಟ್ ಆಗಲ್ಲ
ನನಗೆ ಬದುಕಿನಿಂದ ದೊಡ್ಡ ದೊಡ್ಡ
ನಿರೀಕ್ಷೆಗಳಿವೆ ಅವನ್ನೆಲ್ಲ ನಿನ್ನಿಂದ FULFIL
ಮಾಡೋಕೆ ಆಗೋಲ್ಲ ಅದಕ್ಕೆ
ಬಿಟ್ಟುಬಿಡು ನನ್ನ .ಅಂದಹಾಗೇ ನಂಗೆ
ದುಬೈಯಲ್ಲಿ ಕೆಲಸ ಆಗಿದೆ ಈ ತಿಂಗಳ
ಕೊನೇಲಿ ಹೋಗ್ತಾ ಇದೀನಿ
ಅಲ್ಲೂ ಇದೇ ಕೆಲಸ ವ್ಯತ್ಯಾಸ ಅಂದ್ರೆ
ಸಂಬಳ ಮಾತ್ರ .
ಖಂಡಿತಾ ನಿಂಗೊಂದು ಕೆಲ್ಸ
ಹುಡುಕ್ತೀನಿ ಇದೆಲ್ಲ ಕೆಲ್ಸಕ್ಕೆ ಬರದ್ದನ್ನ
ಯೋಚ್ನೆ ಮಾಡಿ
ಲೈಫ್ ಹಾಳ್
ಮಾಡ್ಕೋಬೇಡ .ಒಂದು ಪಾಸ್ಪೋರ್ಟ್
ಮಾಡಿಸ್ಕೋ .
ಎದ್ದೇಳು ಹೋಗೋಣ ಬಾ
-ಕೆಂಚನೂರಿನವ

ಹೇಗೆ ಹೊಗಳಲಿ ನಿನ್ನ
ನೀ ಈ ಜಗದ ಅದ್ಭುತವೆಂದು
ನೀ ನನ್ನ ಅದ್ಭುತ ಜಗವಾಗಿರುವಾಗ
ಇಹ-ಪರ ಮೀರಿದ ಅಲೌಕಿಕ ಅನುಭೂತಿ
ನೀನು
-ಕೆಂಚನೂರಿನವ

ಇಂದು ಮಂದಾನಿಲವು
ಹೊಸ ಘಮವ ಬಯಸುತಿದೆ
ತಾ ಸುಳಿವ ಹಾದಿಗೆ ಹಂಚಲು
ಕರುಣಿಸಬಾರದೆ ನೀನು
ಒಂದಿಷ್ಟು ನಗುವರಳಿಸಿ

-�ಕೆಂಚನೂರಿನವ

ಸಂತೆಯಲ್ಲೊಂದು ಏಕಾಂತ
ಸೃಷ್ಟಿಸಿಕೊಳ್ಳಲು ನಿನಗಷ್ಟೇ ಸಾಧ್ಯ
ಓ ಬರಿಗಾಲ ಫಕೀರನೇ...
ನನಗೂ ಹೇಳಿಕೊಡು
ಜಗದ ನೆಂಟನಾಗಿಯೂ
ಅಂಟುಳಿಸಿಕೊಳ್ಳದೆ ಬದುಕುವುದನ್ನ
ಖಾಲಿ ಜೋಳಿಗೆಯೊಂದಿಗೆ
ಹೊರಡಬೇಕು ನಾನು ಅಲೆಮಾರಿಯಂತೆ,
ಥೇಟ್ ನಿನ್ನಂತೆ

-ಕೆಂಚನೂರಿನವ

ಇಂದು ಮಂದಾನಿಲವು
ಹೊಸ ಘಮವ ಬಯಸುತಿದೆ
ತಾ ಸುಳಿವ ಹಾದಿಗೆ ಹಂಚಲು
ಕರುಣಿಸಬಾರದೆ ನೀನು
ಒಂದಿಷ್ಟು ನಗುವರಳಿಸಿ

-�ಕೆಂಚನೂರಿನವ

ಇವಳ ಕಣ್ಣಬೆಳಕಿನ ಸಾಲದಲ್ಲಿ
ಹೊಳೆಯುತ್ತಾನೆ
ಬೆಳ್ಳಿ ಚಂದಿರ
ರವಿಯೊಡನೆ ಮುನಿಸುಂಟಾದ ದಿನ
ಇಲ್ಲ ಬಿಡಿ
ನಿಮಗೆ ಸಿಗಲಾರದು
ಇವಳ ಕಣ್ಣ ಹೊಳಪಿನ ಅಂದಾಜು
-ಕೆಂಚನೂರಿನವ

ನಟಿಸು ನೀನು ಒಂದಷ್ಟು ಹೊತ್ತು
ಮರೆತಂತೆ ನನ್ನನು
ಹೊಸದಾಗಿ ಪರಿಚಯಿಸಿಕೊಳುವೆ
ನಿನಗೆ
ನನ್ನನ್ನು ನಾನು
-ಕೆಂಚನೂರಿನವ

ಒಂದು ಚಂದ ಆರೋಪ
ಹೊರಿಸುವೆಯಾದರೆ ಹೇಳು,
ನಾ ನಿನ್ನ ಹೃದಯ ಕದ್ದೆನೆಂದು

ನಾ ಸಿದ್ಧನಿರುವೆ
ನೂರು ವರ್ಷ ಖೈದಿಯಾಗಲು
-ಕೆಂಚನೂರಿನವ

ನಿಜ
ನೆನಪು ನವಿರಾದ ನವಿಲ
ಗರಿಯೆಂಬುದು ಸುಳ್ಳು
ನೆನಪೆಂಬುದು ಅಂಗಾಲಿನಲ್ಲಿ ಮುರಿದ
ಮುಳ್ಳು

ಮಧುಶಾಲೆಯೆಂಬುದು
ಪಾಪಿಗಳ ಪಾಲಿನ ಸ್ವರ್ಗ
ಪುಣ್ಯವಂತರೇ
ಸ್ವರ್ಗ
ಕಾಣಲು ಸಾಯುವವರೆಗೂ ಕಾಯುವ
ನಿಮ್ಮ ಕುರಿತು ಕರುಣೆಯಿದೆ ನನಗೆ
-ಕೆಂಚನೂರಿನವ

ಓ ಕಾಲವೇ
ಕಿತ್ತುಕೊಳ್ಳದಿರು ಇಷ್ಟು ಬೇಗ
ಯೌವನವನ್ನು
ಬಾಕಿಯಿವೆ ಇನ್ನೂ
ಮಾಡಲೇ ಬೇಕಾದ
ಒಂದಿಷ್ಟು ಪಾಪಗಳು
-ಕೆಂಚನೂರಿನವ

ಕಹಿಯೆಂದು ದೂರದಿರು ಗೆಳೆಯ
ಮಧುವನ್ನು

ಅದಕೂ ಕಹಿಯಾದ ನೆನಪಿದೆ
ನನ್ನೆದೆಯಲ್ಲಿ

-ಕೆಂಚನೂರಿನವ

ನಲವತ್ತು ದಾಟಿದ
ನಟಿಯ ಮನೆತುಂಬಾ
ಒಡೆದ ಕನ್ನಡಿಗಳು,
ನೆರಿಗೆ ತೋರಿಸದ
ಕನ್ನಡಿಯ ಹುಡುಕಾಟದಲ್ಲಿದ್ದಾಳಂತೆ
ಪಾಪ

1)
ಸಾಕಿ ಹೇಳಿದ್ದು
ಯಾ ವ ಮಧುವೂ ರುಚಿಸದು
ಎದೆಯಲ್ಲಿ ನೋವಿಲ್ಲದೆ

2)
ನೀನು ಕಣ್ಮುಚ್ಚಿ
ನಿದ್ರಿಸುವುದನ್ನೇ ಕಾಯುತ್ತಿವೆ
ನಕ್ಷತ್ರಗಳು:
ಬಿಡು,ಅವೂ ಹೊಳೆಯಲಿ
ಒಂದಷ್ಟು ಹೊತ್ತು ಕತ್ತಲಲಿ

3)
ನೋವಿಲ್ಲದೆ ಕುಡಿದೆ,
ಅಪಚಾರವಾಯ್ತು ಮಧುವಿಗೆ.
ಕ್ಷಮೆಯಿರಲಿ ಸಾಕಿ

4)
ಕುಡುಕರಾದರೆ ಅಪರಾಧವಲ್ಲ,
ಕೆಡುಕರಿಗೇನೆ ಕ್ಷಮೆಯಿದೆ
ಕುಡುಕರಿಗಿಲ್ಲವೆ?

5)
ಇವಳು ಪಲುಕುವ ಪಿಸುನುಡಿಗಳು
ಮಧುವಿನಷ್ಟೇ ಅಮಲೇರಿಸುತ್ತಾವೆ,
ನಂಬಿ, ನಾನೀಗ ಕುಡಿದಿಲ್ಲ

6)
ಇವಳ ಬಾಗು-ಬಳುಕುಗಳನ್ನು
ಇಂದ್ರ ಛಾಪಕ್ಕೆ ಹೋಲಿಸದಿರಿ,
ಇವಳಲ್ಲಿವೆ ಏಳಕ್ಕೂ ಮಿಕ್ಕಿ ಬಣ್ಣ

7)
ಕುಡಿದವನಿಗೆ
ನೆಲವೇ ತೊಟ್ಟಿಲು
ತೂಗುತ್ತದೆ ನಡೆವಾಗಲೂ

-ಕೆಂಚನೂರಿನವ

ರುಜುವಾತು
ಅವಳು
ಈಗಷ್ಟೇ ಹಾದು ಹೋದಂತಿದೆ
ಈ ಹಾದಿಯಲ್ಲಿ
ನೀವೇ ನೋಡಿ
ಈ ಬೀದಿ ದೀಪ
ತುಸು ಹೆಚ್ಚೇ ಹೊಳೆಯುತ್ತಿದೆ
ಈ ಸಂಜೆಯಲಿ
ನಾನೇಕೆ ಸುಳ್ಳು ಹೇಳಲಿ
ಸಾಕ್ಷಿಯಿಲ್ಲವೆ ನನ್ನ ಬಳಿ...?

ಎಲೆ ಎಲೆಯ ಮೇಲೆ
ಹನಿ ಹನಿಯ ತಾನ

ಈ ಇಳೆಯ ಮೇಲೆ
ಆ ಮಳೆಗೆ ಪ್ರೇಮ

-ಕೆಂಚನೂರಿನವ

ಬಲು ರೋಮಾಂಚಕ
ಹಾದಿ ತಪ್ಪಿದ
ಹಡಗಿನ ಯಾನ

ಗುರಿ ತಲುಪುವುದು
ಅನುಮಾನವಷ್ಟೇ
ತೇಲುವ ಸುಖ
ಅನುಭವಿಸಬೇಕು
ಮುಳುಗುವವರೆಗೂ

-ಕೆಂಚನೂರಿನವ

ಅವನು
ಮೊನ್ನೆ ಬಂದಿದ್ದ
ನನ್ನ ತುಂಬುಗೆನ್ನೆಯ ಮೇಲೆ
ಕವಿತೆ ಬರೆಯುತ್ತಿದ್ದವನು

ಈ ಹೋಟೆಲಿನ
ಮಬ್ಬು ಬೆಳಕಿನ ಕೋಣೆಯಲ್ಲಿ
ನನ್ನ ಇಳಿಬಿದ್ದ ಕೆನ್ನೆ
ಅವನು ನೋಡಿರಲಿಕ್ಕಿಲ್ಲ

ಎಷ್ಟು ನೊಂದುಕೊಳ್ಳುತ್ತಿದ್ದನೋ
ನೋಡಿದ್ದಿದ್ದರೆ

-ಕೆಂಚನೂರಿನವ